?
Presidentja e Kosovës, Atifete Jahjaga, tash për tash nuk pritet të ndërmarrë ndonjë veprim për thirrjen e vazhdimit të seancës konstituive të Kuvendit pa një nismë politike nga partitë e përfaqësuara në Parlament.
Ndonëse nga Zyra e Jahjagës nuk janë prononcuar për këtë çështje, burime nga partitë politike të cilat kohët e fundit kanë zhvilluar takime në Presidencë, i kanë thënë gazetës se presidentja u ka bërë atyre me dije se pret fillimisht që vetë deputetët të merren vesh për seancën.
“Na është thënë që i takon deputetes Flora Brovina t’i fillojë përgatitjet për thirrjen e seancës”, kanë thënë këto burime.
Sipas tyre, presidentja megjithatë u ka lënë të hapur mundësinë partive politike që nëse janë të interesuara, ajo do të ndihmojë personalisht në lehtësimin e arritjes së një marrëveshjeje që do të garantonte tejkalimin e krizës.
Po ashtu, të njëjtat burime kanë theksuar se Jahjaga është zotuar që nuk do të presë në pafundësi zvarritjet e reja rreth konstituimit të Kuvendit dhe nëse deputetët dhe Flora Brovina nuk ndërmarrin ndonjë iniciativë, atëherë presidentja mund të luajë rolin e vet sipas Kushtetutës./Tribuna/.