Nuk është vetëm Universiteti i Prishtinës që po përballet me telashe edhe afera. Edhe në Universitetin e Prizrenit “Ukshin Hoti” (UPZ) ka pakënaqësi për shkak të të punësimit të stafit akademik, mësimdhënësve jo adekuatë
Ky ka qenë edhe shkaku që ushtruesi i detyrës së Dekanit në Fakultetin e Shkencës Kompjuterike në UPZ, Ermir Rogova, të jap dorëheqje.
“Me punësimin e fundit të tre personave totalisht joadekuat për Fakultetin e Shkencës Kompjuterike, përkundër insistimeve të mia të arsyetuara dhe duke shkelur rekomandimin e komisionit recenzues, menaxhmenti i Universitetit të Prizrenit ka krijuar një situatë e cila më pamundëson kryerjen me profesionalizëm dhe ndërgjegje të detyrave të mia si udhëheqës i fakultetit”, ka thënë për Telegrafin Emir Rugova u.d. i dekanit në dorëheqja.
“Si dekan, detyra ime kryesore është sigurimi i cilësisë në mësimdhënie të cilën nuk mund ta siguroj me mësimdhënës të profileve (Arkitekturë, Mekanikë dhe Xehetari) që nuk ndërlidhen fare me Shkencën Kompjuterike. Fatkeqësisht janë gjenerata të tëra të studentëve ata të cilët do të vuajnë pasojat, dhe këtë nuk ma lejon ndërgjegjja”, ka thënë Rogova.
Ndërkohë, tash e sa ditë, disa organizata studentore janë duke protestuar para rektoratit të Universitetit të Prishtinës.
Kërkesë e tyre është dorëheqja e menjëhershme e rektorit të UP-së Ibrahim Gashi, fillimi i hetimeve rreth keqpërdorimeve në Universitet, përmirësimi i infrastrukturës në Qendrën e Studentëve dhe largimi i ndikimit të pushtetit në Universitet nëpërmjet heqjes së Këshillit Drejtues