Në vazhdën e takimeve elektorale për zgjedhjet e 3 nëntorit, kandidati i koalicionit AAK-LDD për kryetar të Prizrenit Lulzim Kabashi i shoqëruar nga bashkëpunëtorë të tij ka mbajtur takim me banorët e fshatit Caparc,.
Ai në këtë fshat prezantoi programin e tij qeverisës për komunën e Prizrenit, gjatë katër viteve të ardhshme.
Kabashi tha se gjatë mandatit të ardhshëm qeverisës, secila familje në komunën e Prizrenit do të ketë së paku një anëtar të punësuar, dhe kjo do të arrihet përmes zhvillimit ekonomik të bazuar në katër shtylla të qëndrueshme duke përfshirë funksionalizimin e zonave industriale, investimet në bujqësi, turizëm dhe ndërtimtari.
“Funksionalizimi i zonave industriale, investimet në bujqësi duke përfshirë blegtorinë dhe nënsektorët tjerë të bujqësisë, investimet në turizëm dhe ndërtimtari, do të ndikojnë në hapjen e vendeve të reja të punës, i cili është edhe synimi jonë kryesor”, tha Kabashi.
Ndërkaq sa i përket investimeve kapitale në rregullimin e ujësjellësit, kanalizimit dhe infrastrukturës rrugore në përgjithësi, Kabashi tha se këto janë kërkesa të mundshme për t’u realizuar, dhe qeveria e ardhshme komunale do të ketë vëmendje të posaçme që këto të rregullohen në gjithë territorin e komunës së Prizrenit duke përfshirë edhe fshatin Caparc, sepse këto janë gjëra elementare për jetë të cilat tashmë do duhej të ishin të rregulluara./PrizrenPress.com/