Ani pse Kosova relativisht mirë e ka të rregulluar çështjen e përzgjedhjes së krerëve të drejtësisë, përfshirë edhe të sistemit gjyqësor e atij prokurorial, e që përafërsisht është një procedurë e ngjashme që aplikohet në shumicën e shteteve demokratike, problemi qëndron tek ndërhyrjet politike në emërimet e tyre, dhe dërgimi i njerëzve të saj në këto poste në drejtësi. Kjo praktikë mjaft negative që e ka përcjellë sistemin e drejtësisë që nga pas lufta, ka bërë që të anashkalohen dhe të lihen jashtë këtij sistemi njerëzit e pavarur dhe profesionistë, derisa të favorizohen dhe t’u jepet përparësi atyre që kanë afinitete apo afërsi politike me njerëzit e fuqishëm të politikës brenda shtetit. Kështu kanë vlerësuar analistët dhe njohësit e kësaj fushe, të cilët edhe kanë veçuar se kjo klasë klanore i ka mbushur gjykatat dhe prokuroritë me militantë të vet joprofesionalë, duke i shkelur dhe duke mos i dhënë hapësirë e mundësi përgatitjes profesionale të të kualifikuarve dhe njerëzve të dijes.
Analisti Shefqet Dibrani, në një prononcim për gazetën “Kosova Sot”, ka thënë se politikanët e Kosovës janë përgjegjësit e krimit politik dhe të korrupsionit ekonomik në vend, derisa, sipas tij, kjo strukturë nuk do ta kishte këtë shtrirje kaq të thellë dhe gjithëpërfshirëse, sikurse nga oligarkët të mos jetë kapur Gjyqësia, Prokuroria dhe segmente të tjera të drejtësisë. ” Paralel me sektorin e drejtë- sisë, kapja e shtetit është përhapur në sektorin e sigurisë, dhe dalëngadalë kanë prekur çdo pjesë të sistemit shtetëror, duke u involvuar edhe në firmat dhe gjigantët e mëdhenj ekonomikë dhe tregtarë”, theksoi ai.
Besimi i tepruar te ndërkombëtarët Sipas Dibranit, nga kjo lidhje e ngushtë klanore kanë përfituar kryesisht të afërmit dhe të njohurit, teksa në anën tjetër nuk kanë mundur të vijnë në shprehje ata që kanë dije dhe dinjitet. “Nëse këtë analogji për një çast e kthejmë te diskutimi publik për demarkacionin, që ka ndodhur më 3 gusht 2016, besoj se në atë diskutim secili qytetar ka vërejtur se ekspertët dhe shkencëtarët nuk lejoheshin të flisnin dhe t’i kontribuonin këtij vendi, ngase njerëzit e aftë dhe ata të dinjitetshëm nuk lejohen të marrin poste të larta, sepse oligarkët e dinë se përballja e parë e tyre duhet të bëhet me ta, prandaj gjendja ka ardhur deri këtu sa në shprehje vijnë nepotizmi dhe veprimet e tjera antiligjore dhe antidemokratike. E, nëse këtyre gjërave nuk iu ka besuar deri më tani ndonjë pjesë e qytetarëve, është afera e përgjimeve telefonike ajo, e cila e qartësoi këtë, por edhe shumë dilema të tjera për të cilat vetëm kemi paragjykuar”, u shpreh ai. Së këndejmi, Dibrani ka nënvizuar se nuk është vetëm drejtësia ajo ku janë vendosur njerëzit e oligarkëve dhe të strukturave politike, por kjo ka ndodhur kudo në pozita me ndikim, si në borde e komisione shtetërore, derisa në anën tjetër shtresa qytetare dhe profesionistët duhet të presin duke u lutur se në këtë vend, “do të bëhet mirë?!”, ka vijuar më tej ai.
“Pastaj një gjë që shqetëson është besimi i tepruar te ndërkombë- tarët, se çdo emërim po bëhet me bekimin e tyre dhe të Amerikës, prandaj askush nuk merr guximin t’u thotë matrapazëve mjaft, pasi ata me perfiditet po i përdorin, përkatësisht janë duke e keqpërdorur ndikimin e BE-së dhe ndikimin amerikan në Kosovë”, theksoi Dibrani.