“Jam njëri ndër këngëtaret pjesëmarrës të festivalit ‘Kënga ime’ në TV Klan. Pas prezantimit të këngëtarit serb, Zdravko Çoliç si mysafir special në javën e kaluar, unë kam vendosur të mos jem pjesë e këtij festivali të këngës shqiptare. Pse s’dua të jem në skenën e këngës shqiptare bashkë me Çoliçin, kam një mijë e një arsye”, – ishte ky reagimi i parë i këngëtarit të muzikës popullore Hysni Klinaku si i ftuar te festivali “Kënga ime”, i cili i tha jo pjesëmarrjes pasi në atë skenë performoi këngëtari i njohur serb, Zdravko Çoliç.
Pas Hysniut, një tjetër këngëtar i ka thënë jo po të njëjtit festival. Visar Peja, një këngëtar i njohur në Kosovë, djali i legjendës së muzikës popullore Ismet Peja, gjithashtu ka reaguar duke braktisur kështu pjesëmarrjen në këtë festival.
“Sigurisht që nuk do të jem pjesë e këtij festivali. Me atë çfarë bënë, definitivisht treguan që nuk kanë lidhje me përjetimet tona. Kur në Rashkë të Serbisë akoma po nxirren eshtrat e shqiptarëve, ata ftojnë një këngëtar serb të jetë pjesë e këtij festivali. Por le të mbetet në përgjegjësi dhe fytyrë të tyre”, ka deklaruar Visari. E të njëjtin veprim deri më tani e ka ndërmarrë edhe këngëtarja e njohur, Yllka Kuqi.
Është dashur të prezantohet pas dy javësh (26 prill) dhe këngët i ka thuajse të përfunduara, porse ka vendosur që të mos paraqitet. “Pas spektaklit të së shtunës (kur u prezantua Çoliçi), kam vendosur të tërhiqem, sepse thjesht më ka ngjallur ndjenja jo të mira e gjithë ajo çfarë ka ndodhur atë natë”, ka thënë këngëtarja.
Ramadan Krasniqi: Zdravko duhet të distancohej nga krimet serbe duke kërkuar falje
Ramadan Krasniqi (Dani) përmes një komunikate ka rikonfirmuar arsyen e anulimit të pjesëmarrjes së tij në spektaklin ”Kënga ime” . Ai ka pohuar se artistët serbë duhet të kenë guximin të kërkojnë falje për krimet që shteti i tyre ka bërë në Kosovë. Sipas Krasniqit, “nëse muzika nuk ka gjuhë, ose është gjuhë unikale botërore, Zdravko Çoliç e asnjë artist tjetër serb deri sot nuk patën guximin njerëzor, të paktën të kërkonin falje për krimet që shteti i tyre ka bërë në Kosovë”.
“Duke ruajtur respektin profesional për të gjithë bashkëpunëtorët e mi në Tiranë, nga të cilët kisha nderin të përfaqësoja Kosovën në këtë program edhe në vitin 2010, unë sot ndihem thellë i prekur nga hapësira që iu dha Çoliçit prej organizatorit”, ka thënë këngëtari Ramadan Krasniqi.
Megjithatë, duke shpresuar se ka qenë një gabim pa dashje nga ana e organizatorit, ka shtuar se nuk e sheh veten në një skenë të Tiranës me Zdravko Çoliç. “Zdravko Çoliç dhe unë njihemi mirë në profesion. Ia kemi përcjellë karrierën njëri-tjetrit. Nuk do të më pengonte aspak që ta konkurroja Zdravkon në ndonjë festival ndërkombëtar, ku Kosova ende nuk pranohet sipasojë e shtetit të tij serb. Muzika nuk ka gjuhë ose është gjuhë unikale botëroredhe aty flet arti, por unë mbetem i bindur thellë se hitet e Zdravko Çoliç, që u takojnëviteve ‘70, ‘80 dhe ‘90, tashmë kanë vdekur, e bashkë me to edhe Jugosllavia. Andaj, ftesa që i bëhet atij, është edhe shumë e panevojshme”, ka vlerësuar Dani.