Rektori i Universitetit “Ukshin Hoti” në Prizren, Ramë Vataj, të hënën ka pritur në një takim përfaqësuesit e komunitetit romë në Prizren, Jolxhi Shala, kryetar i KNRP-së dhe Kujtim Pacaku, deputet i Kuvendit Kosovës nga ky subjekt politik.
“Rektori Vataj theksoi se si të gjithë të tjerë edhe studentët e këtij komuniteti do t’i mbështesë që të kenë mundësi të sigurojnë shkollim universitar që nesër të bëhen të zotë e vetvetes dhe të kontribuojnë për familjet e tyre dhe për shoqërinë në përgjithësi.
Përfaqësuesit e këtij komuniteti kërkuan nga UPZ që të krijojë një kuotë për regjistrim të studentëve nga kjo kategori e shoqërisë, që tu jepet mundësia për shkollim, pasi që kjo është pika më e dobët e këtij komuniteti.
Rektori Vataj i siguroi se këtë çështje do ta diskutoj në MASHT, pasi që është kompetent për caktimin e kuotave dhe se do të bëjë çfarë është e mundur që në suaza të ligjit të sigurohet përfshirje në arsimin e lartë edhe për këtë kategori të shoqërisë përmes krijimit të një kuote të posaçme”, thuet në kumtesën e UPZ-së. /PrizrenPress.com/