Kryetari në largim i Malishevës, Isni Kilaj, ka thënë se më shumë preferon të jetë në konkurrencë për nivel qendror në zgjedhjet e ardhshme sesa t’i kthehet edhe një herë garës për pushtetin lokal.
“Më tepër preferoj të jem në konkurrencë për deputet të Kuvendit të Kosovës sepse zgjedhjet për nivelin lokal janë kryer. Kështu që, për katër vjet është periudhë e gjatë dhe nuk e dimë se çka do të ndodhë në politikën e Kosovës dhe në PDK”, ka thënë Kilaj për “Epokën e re”, duke rikonfirmuar se edhe më tutje do të jetë pjesë aktive e politikës.
“Për momentin jam anëtar i Këshillit Drejtues të PDK-së dhe jam kryetar i Degës së PDK-së në Malishevë, por ende nuk jemi ulur ta bëjmë analizën e rezultatit të fundit që kemi pasur në zgjedhjet lokal edhe si degë, por edhe si parti. Por, sigurisht se do të jem në politikë edhe më tutje”, ka theksuar Kilaj.