Anëtarët e Komisiont të Kuvendit të Kosovës për Arsim, Shkencë, Teknologji, Kulturë, Rini dhe Sport, të hënën kanë vizituar Universitetin e Prizrenit “Ukshin Hoti” ku janë pritur nga rektori i këtij universiteti, Prof. Dr. Ramë Vataj.
Delegacioni ishte në përbërje nga Nait Hasani, kryetar i Komisionit, Zëvendëskryetari i parë, Salih Morina, anëtarët Teuta Haxhiu dhe Shpejtim Bulliqi.
Fillimisht anëtarët e këtij komisioni uruan rektorin Vataj për detyrën duke i dëshiruar suksese në punë. Ata e njoftuan Rektorin Vataj për punët që janë duke i bërë në hartimin e DraftLigjit për Arsimin e Lartë dhe kërkuan nga menaxhmenti i UPZ-së që të japin sugjerimet dhe rekomandimet përkatëse.
Rektori Vataj i falënderoi anëtarët e Komisionit për vizitën dhe i njoftoi ata me të arriturat që janë shënuar në UPZ që nga themelimi dhe me vështirësitë që është ballafaquar dhe që vazhdon të ballafaqohet ky universitet.
Ai kërkoi nga anëtarët e këtij Komisioni funksional të Kuvendit të Kosovës që të mbështesin UPZ-në në adresimin e nevojave që ka, si në aspektin e rritjes së buxhetit ashtu edhe në rritjen e numrit të punëtorëve të lejuar që të punësoj.
Anëtarët e Komisionit u zotuan se do të kujdesën për adresimin e nevojave të këtij Universiteti si edhe të gjithë universiteteve të tjera publike në vend.