Deputeti i Lëvizjes Vetëvendosje!, Glauk Konjufca, ka thënë se e di arsyen pse disa prej deputetëve të PDK-së e ndërruan mendjen herën e dytë për ta votuar Gjykatën Speciale.
“PDK-ja i ka kërcënuar deputetët e vet se do të ketë zgjedhje, e ata që e votuan kundër herën e parë, nuk do t’i përfshijë në lista”, ka thënë Konjufca në “Info Magazine” të Klan Kosovës.
I pyetur pse nuk organizoi protestë Lëvizja Vetëvendosje! kundër Speciales, ai është shprehur se një të tillë e kanë organizuar veteranët e UÇK-së.
“Kjo ka qenë fillimisht një iniciativë e veteranëve. Ata e kanë marrë përsipër ta organizojnë protestën e parë, e ne i kemi mbështetur me aktivistët tanë. Ne nuk e kemi konsideruar të mundshme organizimin e një proteste, por e kemi parë të arsyeshme t’i bashkëngjitemi një proteste ekzistuese”, ka deklaruar Konjufca.