Shumë pikëpyetje rreth futbollit, por dëshira e njëjtë: ky sezon duhet të përfundojë në fushë. Belgjika dhe Skocia janë vendet që për momentin kanë dalë nga rreshti dhe mendojnë ta përfundojnë sezonin që tani, por ende nuk ka një vendim përfundimtar. Me siguri në këto shtete nuk dëshirojnë të humbasin pjesëmarrjen në kupat e Europës, sezonin pasardhës.
Hipotezat për Champsions League janë të shumta, teksa dy janë kryesoret: sfidat e kampionateve dhe të kupave të Europës të zhvillohen paralelisht, kurse plani tjetër është të mbyllen kampionatet deri në fund të korriku dhe më pas të luhen Champions dhe Europa League. Momentalisht kanë mbetur 17 ndeshje të Champions pa u zhvilluar.
UEFA po shikon çdo opsion, t’i luajë të gjitha këto ndeshje, t’i bëjë me një takim dhe kështu deri në fund do ishin në program 11 takime, plani tjetër është me grumbullim të tetë ekipeve të fundit, ose të katër ekipeve. Në të tria këto raste do luheshin 11 takime.
Dëshira tjetër e UEFA dhe FIFA është që kampionatet të mbarojnë njëkohësisht, në mënyrë që edhe dritarja e merkatos të jetë e njëjtë dhe të mos krijohen probleme. Sa u takon kontratave, ato do të jenë të vlefshme deri në përfundim të sezonit, por këshillohet që klubet dhe lojtarët të gjejnë gjuhën e përbashkët për këtë, pasi duhen respektuar ligjet dhe kodet e punës në vendet përkatëse.