Dega e Lidhjes Demokratike të Kosovës në Prizren ka gjetur rehati të përkohshme. Që pas rezultatit të zgjedhjeve lokale më 3 nëntor, në këtë degë është kërkuar edhe shkarkimi apo dorëheqja e kryetarit të degës Eqrem Kryeziu. Ky i fundit ka refuzuar një gjë të tillë, ndërsa situata është përkeqësuar aq shumë saqë një pjesë e degës kishte filluar të mbledhë nënshkrimet që kërkonin largimin e Kryeziut.
Kryetari i Degës së LDK-së në Prizren, Eqrem Kryeziu, për gazetën Tribuna ka thënë se forma që është kërkuar largimi i tij, nuk ka qenë në rregull, prandaj ai tha se ka këmbëngulur që të gjendet një opsion deri në zgjedhjet e reja.
“Janë mbledhur nënshkrime pa i dhënë edhe unë opinionet e mia. Nuk mund të mblidhen nënshkrime pa i shfaqur edhe unë pikëpamjet e mia. Në LDK nuk veprohet pa i dhënë shans edhe mendimit tjetër. Në këto rrethana Isa Mustafa propozoi që jo të shkarkohet kryesia por të themelohet një shtab që do të veprojë në këta ishuj”, ka thënë Kryeziu.