Kryetari i Komunës së Prizrenit, Ramadan Muja, të premten ka vizituar nxënësit e shtrirë në repartin infektiv të Spitalit rajonal të Prizrenit, që janë prekur nga sëmundja e parotitit, me ç’rast ka hezituar të përdorë fjalën “epidemi”, ani pse ekspertët e shëndetit publik kanë nënvizuar se bëhet fjalë për virus epidemik.
Muja gjatë paraqitjes para medieve ka bërë të ditur se është fat i keq që në shkollat e Komunës së Prizrenit është shfaqur sëmundja e parotitit, për të shtuar më tej se nuk është përhapur aq shumë.
“Është një rast specifik, ngjarje specifike që ka përfshirë nxënësit e pas 90-ve, të cilët ose janë vaksinuar dhe nuk janë kontrolluar, nuk është përcjellë gjendja e tyre ose vaksinat kanë qenë jo në rregull dhe për fat të keq po e vuajnë nxënësit e sotëm”, ka thënë Muja, shkruan Koha Ditore.