Ekzekutivi i ri në Prizren po mundohet me çdo kusht ta kthej rregullin dhe rendin urbanistik në qytet, i cili kohëve të fundit është degraduar dukshëm nga ndërtimet e shumta.
Inspektorati dhe urbanizmi janë bërë bashkë në parandalimin e këtij fenomeni jo të mirë për qytetin. Madje këto dy dikastere brenda muajit kanë ndërmarrë pesë aksione të rrënimeve. Ngjashëm u tha se do të veprohet edhe në zonën e mbrojtur pasi të formohet “Taskforca” e propozuar nga Ministria e Mjedisit dhe Planifikimit Hapësinor.
Ndërtimeve pa leje në qytetin e Prizrenit po u vije fundi. Të vendosura si kërpudhat pas shiut këto ndërtime i kanë prishur hijeshinë Prizrenit historik. Ndonëse është folur shumë për to, nuk është ndërmarrë ndonjë veprim konkret për t’i parandaluar. Mirëpo, ekzekutivi i ri komunal i formuar pas zgjedhjeve të fundit i ka vënë kusht vetës që Prizrenit t”ia rikthej planin urbanistik. Dy dikasteret ajo e inspektorateve dhe urbanizmit kanë intensifikuar bashkëpunimin gjë që po rezulton me marrjen e masave. Drejtori i Inspektorateve, Bedri Bytyqi u ka bërë thirrje qytetarëve që t’i ndalojnë punimet nëse nuk kanë leje ndërtimi, sepse siç tha ai komuna e Prizrenit është e vendosur të krijoj rend dhe rregull në planin urbanistik.
Ndërkohë edhe Drejtoria e Urbanizmit ka intensifikuar punët në teren. Drejtori, Nijazi Kryeziu thotë se në njëqind ditshin e qeverisjes synon ti verifikojë të gjitha rastet në teren të cilat nuk kanë respektuar lejet e ndërtimit. Ai kërkoi nga qytetarët që për të gjitha shqetësimet t’i drejtohen dikasterit që drejton i cili tha se do t”u jep përgjigje çdo familje të Prizrenit në afatin kohor prej tridhjetë ditësh, raporton rtk.
Zyrtarët komunalë thanë se intervenime do të ketë edhe në qendrën historike të Prizrenit e cila mbrohet me ligj. Sipas tyre një hap i tillë do të ndërmerret pasi të formohet “Taskforca” e paralajmëruar nga ministri i Mjedisit, Dardan Gashi, kohë më parë.