Njësoj jam kur kam edhe kur s’kam
se ti më vjen pranë e më pranë
dehet kush dehet rakia kërkund
del e bardha dritë ti më lëkund
pehatet erës molla e vjetër
dikur ti ma nis një këngë tjetër
që zgjat sa deri te dita e gatitur
në të ti gjithnjë je e përtëritur
këndellem edhe unë për natën
që e pres me drithma të reja
kur vishet xhamit te penxhereja
ndalem e mat gëzimin që patëm
njësoj jam njësoj kam pak e arrij shumë
veç pakëz hare ma merr nata
ma kthen ti kur kridhem nën flokët e gjata
hesht ti hesht unë zgjatet udha djersë një lumë.
Skender Berisha