Data dhe vendi se ku do të përballen Oleksandr Usyk dhe Anthony Joshua në revanshin për titullin e peshave të rënda do të zbulohet brenda dy javëve.
Ukrainasi Usyk, mbajtës i titullit të WBA, IBF, WBO dhe IBO mundi Joshua-n shtatorin e kaluar me vendim unanim në stadiumin “Tottenham Hotspur”.
Usyk ishte vendosur të përplasej sërish me Joshua-n në pranverë, përpara se Rusia të pushtonte atdheun e tij dhe planet fillestare ndryshuan.
35-vjeçari u kthye në vendin e tij për të luftuar në vijën e parë. Usyk nuk u lëndua dhe ai ka konfirmuar se tani është larguar nga Ukraina për të filluar stërvitjen për luftën e tij për titullin.
Promotori i Usyk, Alexander Krassyuk tha për “Sky Sports” se “Brenda dy javëve të ardhshme ne presim të finalizojmë detajet”.
“Fundi i qershorit është gjithashtu koha që po shqyrtojmë tani. E mira është se Usyk është tashmë në Evropë për të filluar përgatitjet e tij”, vijoi ai.