Kuvendi i Kosovës nuk do të arrijë që deri në përfundimin e sesionit pranveror ta ratifikojë Marrëveshjen për Demarkacionin me Malin e Zi, që konsiderohet kusht edhe për liberalizimin e vizave. Kjo për faktin se Qeveria ende nuk e ka dërguar në Kuvend marrëveshjen pasi ka kundërshtime të ashpra nga opozita, por së fundmi edhe nga vetë partitë në koalicionin qeverisës. Kjo zvarritje mund të shtojë skepticizmin se procesi i liberalizimit të vizave mund të zvarritet, madje edhe të dështojë këtë vit.
Deputetët e Kuvendit të Kosovës theksojnë se faji do t’i bjerë pozitës nëse dështon liberalizimi, porse pajtohen se çështja e demarkacionit është serioze dhe do shqyrtim dhe analizë të thellë, shkruan gazeta ‘Zeri’.
Ministri i Integrimeve Evropiane, Bekim Çollaku, ua ka rikujtuar partive në pushtet dhe Kuvendit të Kosovës se tani “topi” është në dorën e tyre për ta përmbushur kriterin e Bashkimit Evropian, atë për liberalizimin e vizave me ratifikim të Marrëveshjes për Demarkacion.