Në bazë të rezultateve pothuaj të qindpërqindta të raundit të dytë të zgjedhjeve lokale, Lidhja Demokratike e Kosovës ka fituar në shtatë komuna, kurse Partia Demokratike e Kosovës në pesë. Nëse llogariten edhe rundi i parë, del se LDK-ja në garën për kryetarë të komunave ka fituar në 10 komuna të vendit, kurse PDK-ja në nëntë sish.
Por, ç’është edhe më keq për PDK-në, pos Prizrenit, ajo ka humbur komunat e mëdha si Peja, Gjilani, Ferizaj dhe Mitrovica, kështu që PDK-së nuk i ka mbetur për tu mburrur me këto zgjedhje. Ajo ka humbur edhe në Malishevë, Lipjan, kurse ka fituar në Klinë dhe Rahovec, transmeton Koha.
AAK-ja, ndërkaq, e ka humbur Pejën, Suharekën dhe Rahoveci, me të cilat ka udhëhequr në mandatin e kaluar, ndërsa e ka fituar Obiliqin.
AKR-ja për herë të parë ka fituar dy kryetarë të komunave, në Gjakovë dhe Mitrovicë, por shumë analistë mendojnë se të paktën fitorja në Gjakovë është meritë e vet kandidates së saj Mimoza Kusari-Lila, e cila tashi edhe zyrtarisht do të jetë gruaja e parë në krye të një komune.