“Epoka e re” ka arritur të sigurojë një kopje të letrës që Kuvendi i Kosovës, konkretisht kryetari Jakup Krasniqi dhe nënkryetari Xhavit Haliti, i cili e kryeson që disa vite delegacionin parlamentar të vendit tonë në AP të NATO-s, ia kishin dërguar më 12 mars 2013 kryetarit të këtij institucioni, që në atë kohë ishte, Dr. Kar A. Lamers, për pranimin e Kosovës në rangun e vëzhguesit.
“Siç jeni në dini një delegacion i Kuvendit të Kosovës për disa vjet me radhë është duke marr pjesë në takimet e Asamblesë Parlamentare të NATO-s në bazën ad hoc. Duke u nisur nga ky fakt, përvoja që kemi fituar gjatë pjesëmarrjeve në këto takime si dhe nga rrethanat e krijuara së fundi në Kosovë, kërkojmë nga ju që Kuvendi të përfaqësohet në takimet e radhës në rangun e vëzhguesit. Me këtë rast ju falënderojmë për angazhimin tuaj, fal të cilit ekziston një bashkëpunim i mirë ndërmjet Asamblesë Parlamentare të NATO-s dhe Kuvendit të Kosovës.
Jemi të bindur se ky bashkëpunim në të ardhmen do të fuqizohet edhe më shumë. Mbesim me shpresë se kërkesa jonë do të merret në konsideratë”, thuhet në këtë letër.
Konfirmimi për pranimin e Kosovës në Asamblenë parlamentare të NATO-s, nënkryetarit të Kuvendit të Kosovës, Xhavit Haliti i ka ardhur edhe nga zëvendëssekretarja e përgjithshme për politika në këtë institucion, Ruxandra Popa.
“Dua të ju njoftoj se Komiteti i Përhershëm i Asamblesë Parlamentare të NATO-s në takimin e mbajtur dje ka rënë dakord që Kuvendit të Kosovës t’i japë statusin e vëzhguesit.
Sipas rregullave tona, ky vendim ende nuk është ratifikuar, mirëpo do të ratifikohet nga Asambleja në Sesionin e plotë që do të mbahet ne Vilnius, por mendova se ju dhe anëtarët tuaj të delegacionin të Kuvendit të Kosovë në AP të NATO-s do të ndiheni të lumtur”, thuhet në letrën e Ruxandra Popa.
