Ish-nënkryetari i parë i PDK-së, Fatmir Limaj, votëbesimin për IQPM-në e ka kërkuar në fshatin Astrazup. Në këtë fshat, Limaj ka marrë edhe një mbështetje të fuqishme për zgjedhjet e 3 nëntorit. Hapësira ku është mbajtur tubimi, nuk ka mjaftur për t’i zënë të gjithë banorët e këtij fshati, të cilët kanë shprehur dëshirën për të dëgjuar konceptin politik të Limajt dhe programin e IQPM-së.
Banorët e Astrazupit kanë garantuar Limajn se në zgjedhjet e 3 nëntorit do të votojnë IQPM-në dhe kandidatin e saj, Ragip Begaj.
Kandidati Begaj, ndërkaq premtoi se pas 3 nëntorit pushteti në Malishevë, do të jetë i qytetarëve e jo i pushtetarëve.“Me marrjen e pushtetit do t’i depolitizojmë shkollat si dhe do të ndahen bursa për nxënësit me nevoja, e jo në baza familjare siç është bërë deri tani”.
Ndërkaq Fatmir Limaj, kërkoi nga qytetarët që para së gjithash ta ruajnë qetësinë dhe të mos bien pre e ndonjë provokimi. ”Ka individ të cilët mundohen të na prishin festën.Unë kërkoj votën e besimit dhe jo të shantazheve e të kërcnimeve”, tha Limaj./PrizrenPress.com/