Fatmir Limaj ka ripërsëritur edhe një herë se zgjidhja e mundshme për tejkalimin e situatës aktuale në vend është referendumi.
Kryetari i Nismës për Kosovën, Fatmir Limaj, ka thënë në Zona B të Klan Kosovës se Qeveria ka vendosur jashtë rendit të saj kushtetues duke vendosur për Kosovën.
Ai ka deklaruar se referendumi është një opsion real dhe do të mund të realizohej, derisa deklaroi se Parlamenti u anashkaluar nga Qeveria, pasi nuk u sjellën marrëveshjet fare në Parlament para se ato të nënshkruheshin.
“Nuk i kanë fituar zgjedhjet për më vendos diçka jashtë mandatit të zgjedhjeve. Me këto veprime ata kanë vendosur për Kosovën nuk e ka të drejtën për të vendosur përtej rregullit kushtetues. Zgjidhja është t’i drejtohemi populli, ose me zgjedhje ose me referendum. Një ligj për referendum me 8 nene. Bëhet referendumi mbyllet dhe kryhet kjo punë. Është nda pozitë dhe opozitë në qëndrimet e tyre.Ne themi ata kanë kaluar mandatin ata thonë ne jemi në mandatin tonë, atëherë shkojmë përmes referendumit ta pyesim qytetarin për marrëveshjen. Vërtet janë këto veprime të pahijshme në parlament, një pozitë e përgjegjshme nuk e sjellë vendin në këtë pozitë”, deklaroi Limaj.
“Nuk shkohet në Parlament pasi të nënshkruhet diçka, është dashur që para nënshkrimit të debatohet, kjo është fyese. Këta e kanë marrë një vendim tjetër që të shkojnë me implementim pa e pyetur fare Parlamentin. Pse këtë njerëz nuk e kanë sjellë në Parlament si më herët. Ajo e 19 prillit ka qenë në Parlament, e mirë apo e keqe, kjo e fundit nuk ka ardhur në Parlament. Informimi bëhet për të treguar procesin, ku janë zhvillimet. Parlamentin e kanë qitur jashtë lojës”, tha ai.
Limaj i pyetur për dërgimin e Asociacionit në Gjykatën Kushtetuese, ai tha se Gjykata Kushtetuese e ka shpall vetën jo kompetente.
“Gjykata Kushtetuese në 2013 patë thënë që kjo kërkesë e juaj për ta interpretuar marrëveshjen e 19 prillit, nuk është kompetencë e jona”, tha Limaj.
Limaj tha se gazi lotsjellës nuk është vepër penale dhe ka shtuar se nuk duhet që të ftohen seanca tjera të Kuvendit.
“Nuk duhet të thirret seanca të terrorizohen qytetarët, deri të gjendet zgjidhja. Gazi lotsjellës nuk është vepër penale është një veprim politik. Ne kemi dy gjëra, opozita dëshiron t’i adresoj çështjet, pozita po dëshiron me përfitu vetëm në vota dhe abuzon me Kuvendin”, ka thënë Limaj.