Partia Demokratike e Kosovës, pas zyrtarizimit të Kadri Veselit në krye të saj, vështirë se mund të dërgohet në opozitë. Analisti për çështje politike, Halil Matoshi ka folur disa fjalë për të parin e PDK-së. Ai thotë se ish-shefi i SHIK-ut rrethohet me shumë enigma të cilat, sipas Matoshit, duhet të zbardhen dhe të tregohet biografia reale.
“Duke e pasur parasysh se Partia Demokratike e Kosovës tash e tre mandate është në pushtet (me koalicione) pas pavarësimit të vendit dhe një mandat para, shihet që është shndërruar në Parti-Shtet dhe është e vështirë të qohet në opozitë. Kadri Veseli vjen në krye të PDK-së si njeri i avanskenës, nga spiunazhi kështu që është pak i njohur si politikan dhe njeri, pra atë e rrethojnë shumë enigma. E për t’u ngjitur në majat e pushtetit shtetëror, ai duhet ta zbardhë së pari jetëshkrimin e tij”, thotë ai.
Më tej, Matoshit shprehet se kryetari i ri i PDK-së do të bëjë reforma në partinë, pasi që shumë zyrtarë të saj kanë hyrë nën “kontrollin” e ndërkombëtarëve.
“Natyrisht që Veseli do të mësyjë rimendimin dhe renovimin e PDK-së sepse kjo parti ka nisë të jetë nën llupën e hetuesve vendor e ndërkombëtar dhe se është në fazën kur po i humb njerëzit e vet kryesor, të cilët dyshohen për vepra kriminale. Mendoj se PDK është në teposhtën e saj të madhe dhe është nisur drejt kalimit në opozitë”, ka thënë ai. /Indeksonline/