Sekretari i Lëvizjes Vetëvendosjes, Dardan Molliqaj ka thënë se marrëveshja për qeverisjes e Kosovës ndërmjet PDK-së dhe LDK-së është më e keqja e mundshme e shumë vështirë se vendi do të ndryshojë me këtë qeveri.
Ai në emision Debat të Klan Kosovës ka thënë koalicioni paszgjedhor VLAN ka qenë mundësi e mirë për një kulturë të re politike, mirëpo ka akuzuar LDK-në dhe Isa Mustafën për tradhti.
“Atë që bëri Mustafa dhe LDK-ja është mënyrë e turpshme. LDK-ja u largua nga blloku në mënyrë tinëzare, të fshehtë, të paturpshme”, tha ai.
Ai u mor edhe me Kujtim Shalën për të cilin tha se ishte më i zëshmi që blloku të funksionalizohet dhe të jetë në pushtet, por në fund u pajtua me postin e zv/kryeministrit dhe ministrit.
“Me këtë qeveri e kemi rrezikuar shtetin e Kosovës, sepse qysh në ditën e votimit e kemi parë që kjo qeveri nuk është sovrane, por e varur nga Serbia”, ka thënë Molliqaj.
Ai tutje tha se Mustafa është vetëm ligjërues i lëndës së mikroekonomisë, por jo edhe njohjes dhe zbatues i duhur për reforma dhe zhvillim ekonomik.
Edhe shefja e Grupit Parlamentar të AAK-së, Donika Kadaj Bujupi ka kritikuar qeverinë PDK-LDK dhe ekspozenë e kryeministrit Isa Mustafa, për të cilin tha se ka qenë bosh dhe jo program i mirëfilltë qeverisës.