Inatet individuale dhe partiake nuk duhet të pengojnë një proces shumë të rëndësishëm siç është transformimi i FSK-së në ushtri.
Kështu tha për Telegrafin analisti Imer Mushkolaj.
Ai tha se ekziston një kohë e përcaktuar me ligj për dërgimin e projektligjit të FSK-së, në Kuvendin e Republikës së Kosovës.
Sipas tij, nëse Qeveria nuk e bën e procedon Projektligjin në Kuvendin, atëherë vet Kuvendi do ta procedojë Projektligjin për lexim të parë.
“Nuk ka nevojë të këtë kurrfarë zvarritjeje për këtë çështje, pavarësisht mospajtimeve ekzistuese. Inatet individuale e partiake nuk duhet të pengojnë një proces shumë të rëndësishëm, siç është transformimi i FSK-së në ushtri”, ka thënë Mushkolaj.
Ndërsa, këshilltari i kryeministrit Isa Mustafa, Bajram Gecaj, ditë më parë ka thënë për Telegrafin se Projektligji është gati mirëpo pritet që partnerët e koalicionit të merren vesh për ta dërguar Projektligjin në Kuvend.
Telegrafi ditë më parë ka raportuar se Projektligji për Forcën e Sigurisë së Kosovës ka marr dritën e gjelbër nga tri ministritë, ajo e FSK-së, Ministrisë së Integrimit Evropian dhe Ministrisë së Financave.
Ndryshe, ky projektligj është dërguar në Kuvend nga presidenti Hashim Thaçi, por Kuvend e kishte proceduar në Qeveri për ta marrë mendimin edhe të ekzekutivit. /Telegrafi/