Kreu i LDK’së Isa Mustafa i është kundërpërgjigjur kryeministrit Hashim Thaçi, në lidhje me deklaratat e këtij të fundit se Brukseli dhe Washingtoni presin fitoren e PDK’së.
Ja reagimi i plotë i Mustafës, ku ai veç tjerash thotë se “ata që në këtë vend kultivuan shtet policor, nuk i nevojiten as Brukselit as Washingtonit”.
E përkujtoj z. Thaçi,
Bruksesli dhe Washingtoni presin fitoren e demokracisë në Kosovë. Ata nuk përcaktojnë se kush duhet të jetë fituese, por këtë e përcakton vullneti i qytetarëve të Kosovës.
Brukseli dhe Washingtoni kanë kërkuar të funksionojë shteti ligjor në Kosovë, të luftohet korrupsioni dhe të sigurohet liria e plotë qytetare.
Qeverisja e PDK-së e ka rrënuar shtetin ligjor e ka kultivuar korrupsionin dhe e ka ngulfat fjalën e lirë. Është vjedhur dhoma e dëshmive në objektet e Ministrisë së Punëve të Brendshme, është korruptuar procesi i shtypjes së pasaportave; ekzekutivi vendosë se kush duhet të burgoset e kush të prangoset, e jo shtylla e drejtësisë.
Brukseli dhe Washingtoni kanë kërkuar që të themelohet Gjykata speciale për të trajtuar raste të rënda të krimit në Kosovë.
Në këto zgjedhje do të fitojë demokracia dhe fryma e shtetit ligjor. Ata që e degraduan këtë vend dhe kultivuan shtet policor nuk i nevojiten as Brukselit dhe as Washingtonit.
Ndryshe Mustafa, pak më parë bëri të ditur edhe se Nesër, LDK e voton FAK’un dhe shpërndarjen e Parlamentit.