Kandidati i Lëvizjes Vetëvendosje për kryetar të Prizrenit, Mytaher Haskuka thotë se qeverisjen nuk e sheh si privilegj, por shërbim ndaj qytetarëve.
Ai tregon se nga sot do të fillojë punën në përpilimin e një oferte për qeverisjen e Prizrenit.
“Nga sot ne do të fillojmë punën në përpilimin e ofertës sonë qeverisëse, ashtu si në Prishtinë, programi do të jetë konkret dhe i matshëm ashtu që qytetarët të kenë mundësi të vlerësojnë punën tonë”, shkruan Haskuka në Facebook.
Postimi i plotë
Të dashur bashkëqytetarë të Prizrenit,
Pas diskutimeve me strukturat e Lëvizjes Vetëvendosje, bisedat me simpatizantët dhe qytetarët e Prizrenit dhe së fundi pas mbështetjes që erdhi nga vota e aktivistëve, pranova të jem kandidat për kryetar komune.
Ju falënderoj të gjithë për mbështetjen! Kandidatura nga radhët e Lëvizjes më bën nder dhe krenar, po njashtu është obligim dhe përgjegjësi e madhe.
Ne qeverisjen nuk e shohim si privilegj por si shërbim ndaj qytetarëve. Për ne qeverisja nuk është qëllim në vete, por mjet për të përmirësuar jetën e qytetarit të thjeshtë. Për ne qeverisja nuk është pushtet, por obligim dhe llogaridhënie.
Prandaj, nga sot ne do të fillojmë punën në përpilimin e ofertës sonë qeverisëse, ashtu si në Prishtinë, programi do të jetë konkret dhe i matshëm ashtu që qytetarët të kenë mundësi të vlerësojnë punën tonë.
Një programi që buron nga nevojat urgjente të lagjeve dhe fshatrave, prandaj miq të nderuar, mendimet dhe sugjerimet tuaja do të jenë të mirëseardhura.
Për drejtësi dhe mirëqenie, na duhet ndryshimi. Për zhvillim na duhet pjesëmarrja.
Për kthimin e shpresës për një të ardhme me dinjit për fëmijët na duhet bashkimi. Së bashku për ndryshimin me #meZemër!