Zvarritja e krijimit të Gjykatës Speciale, shihet si një lojë e rrezikshme që po e luan Hashim Thaçi. Një diplomat i lartë i akredituar në Prishtinë, i ka thënë Gazetës Blic se ndërkombëtarët janë të shqetësuar me këtë “lojë” të liderit të Partisë Demokratike të Kosovës.
Sipas këtij diplomati, pavarësisht pse lideri i PDK-së para opinionit dhe në takimet me diplomatë të ndryshëm po mundohet të tregoj se po punon në drejtim të sigurimit të votave për themelimin e Gjykatës Speciale, askush nga ndërkombëtarët më nuk po beson se ai këtë çështje e ka seriozisht.
“Ne e dimë që ai nuk e ka shumë seriozisht në këtë punë dhe e dimë fuqinë e tij, prandaj deklaratat e tij nuk janë të sinqerta”, tha ky diplomat.
Gjithnjë sipas këtij diplomati ndërkombëtar, ky veprim i Hashim Thaçit i ka rebeluar teje mase ndërkombëtarët.
“Me këtë sjellje Hashim Thaçi shumë shpejt do ta humb besimin dhe mbështetjen e partnerëve ndërkombëtar”, ka thënë ky burim.
Ndërkohë, gjatë ditës së djeshme, Hashim Thaçi e kishte mbledhur Grupin parlamentar të PDK-së, ku kishte kërkuar mbështetje nga deputetët për Gjykatën Speciale, në të kundërtën ai kishte paralajmëruar dorëheqjen nga kryetari i partisë.
Pavarësisht kësaj, shumë deputetë të PDK-së vazhdojnë të jenë kundër themelimit të Gjykatës Speciale.
Në anën tjetër, analisti politik, Halil Matoshi në një deklaratë që e ka dhënë dje për Gazetën Blic ka thënë se Hashim Thaçi po luan lojë të dyfishtë.
“Mendoj se kjo është vetëm edhe një farsë në vazhdën e bombardimit të publikut kosovar me këso lojërash të dyfishta të vet liderit të PDK-së, Zotit Hashim Thaçi. Që ditën kur dështoi votimi i amendamentit nr. 24 në Kuvend, që mundëson krijimin e Gjykatës Speciale, ai është dashur të mendojë se ai po e komplikonte situatën tej mase, prandaj këtë kinse presion është dashur t’ua bëjë deputetëve të partisë së tij para se ata të votonin kundër”, ka thënë Matoshi.
Sipas tij, të gjithë e dinë, se Hashim Thaçi ka kontroll të plotë mbi partinë.
“Publiku kosovar e dinte se pos deputetëve Hasani e Demaku, të gjithë të tjerët janë nën diktatin e liderit të partisë, e posaçërisht Flora Brovina e cila me urdhra të Thaçit e mbajti peng për gjashtë muaj krijimin e Qeverisë”, ka thënë Matoshi për Gazetën Blic.
Para katër javësh, ishin pikërisht 13 deputetë të PDK-së, ata të cilët e rrëzuan në Kuvend amendamentin kushtetues, i cili do t’i hapte rrugë themelimit të Gjykatës Speciale.