Në ambientet e Bibliotekës Kombëtare është promovuar libri “UÇK përballë shpifjeve” të autorit Kudusi Lama.
Në promovimin e këtij libri morën pjesë shumë personalitete, aktivistë e veprimtarë të çështjes kombëtare, raporton “Epoka e re”.
Ky libër, me theks të veçantë i kundërvihet raportit famëkeq të ish-senatorit dhe ish-prokurorit zviceran, Dick Marty, si dhe dokumenteve politike e propagandistike të sponsorizuara nga shtetit serb kundër luftës së UÇK-së, siç është libri “Engjëjt e zinj të skëterrës Kosovare – Dosjet sekrete”.
Sipas redaktorit të librit, Arben Veselaj, me këtë libër gjeneral Lama ngreh shqetësimin se si ndërgjegjja politike dhe intelektuale e botës shqiptare për tërë këto vite nuk po arrin të ofrojë fakte dhe dëshmi, për t’i rrëzuar pretendimet monstruoze të përfaqësuesve të drejtësisë ndërkombëtare me seli në Hagë; se si Prokuroria e Gjykatës Speciale po e zëvendëson atë serbe; se si drejtësia evropiane është shndërruar në një instrument politik kundër lirisë dhe pavarësisë së Kosovës, etj.
Gjenerali i luftës së Kosovës, Kudusi Lama, është autor i disa librave nga fusha e studimeve ushtarake dhe të sigurisë.
Ai gjithashtu ka botuar edhe disa libra publicistikë dhe nga fusha e mendimit politik.
