Në fshatin Kuqishtë të Rugovës edhe sivjet u mbajtën Lojërat Tradicionale “Rugova 2013”, të 21-tat me radhë, që kishin tubuar njerëz nga të gjitha viset shqiptare – nga Shqipëria, Vuthajt në Mal të Zi, Malësia shqiptare e Rozhajës, Kelmendasit e Mitrovicës dhe ata të Sibovcit, ku secili në mënyrën e vet kanë shpalosur trashëgiminë kulturore e historike të tyre.
Lojërat Tradicionale i organizon Komuna e Pjesë dhe mbahen nën patronatin e kryetarit të saj, ndërkaq bashkorganizatorë janë Bashkësia Territoriale e Rugovës, Ansambli Folklorik Autokton ” Rugova”, komuniteti, Shoqata e Sporteve dhe Lojërave Tradicionale te Rugovës.
Në Lojërat Tradicionale të prezantohen tradita dhe shumëllojshmëria kulturore e kësaj zone – Lojërat e shkathtësive fizike e luftarake te burrave, lojërat dëfryese, këngët , vallet dhe ritet, që kane një zanafille të hershme. Ky manifestim tradicionalisht mbahet në muajin gusht, menjëherë pas kositjes se livadheve dhe deri me tani ato janë mbajtur në Qafe Hajle e Bogë, kurse sivjet në Kuqishtë. “Ne, si këshill organizues, po mundohemi që këtë trashëgimi kulturore ta ruajmë dhe ta bartim nder breza, e kjo bëhet e mundshme me organizime të tilla, siç janë Lojërat Tradicionale”, tha nder të tjera kryetari i B.T. të Rugovës, Arianit Demaj, transmeton Koha.
Kryetari i Komunës së Pejës, Ali Berisha, duke përshëndetur pjesëmarrësit, tha se ky manifestim yni i trashëgimisë kulturore e bën Pejën dhe Rugovën shumë më atraktive për ofertën e madhe turistike, të shpallur këtë vit si Destinacion i turizmit botëror nga Organizata Botërore e Turizmit. Ndërkaq, drejtori i AFA Rugova,Vesel Nikçi, njëri ndër organizatorët, theksoi se me këtë manifestim po bashkojmë Alpet Shqiptare, etnikun verior shqiptar, për të dëshmuar kështu autoktoninë tonë në këto treva Iliro-dardane, duke shpalosur këngë e valle, lojëra dhe veshje si dhe tërë atë koloritin kulturor e historik të cilin, sipas tij, e kultivuam dhe e ruajtëm me fanatizmin më të madh nga lashtësia.
Në kuadër të këtij programi u mbajtën 6 disiplina garuese tradicionale, ku morën pjesë mbi 100 garues në të gjitha disiplinat, siç ishte hedhja e gurapeshit, hedhja e llastarit, rrëzimi i duarve, tërheqja në litar, mundje, ngjitja ne shilor dhe gara demonstruese veku në sharrë.
Nazmi Iberdemaj, njëherit refer ndërkombëtar i sportit në karate dhe përgjegjës për këto disiplina sportive në Rugovë, është shprehur i kënaqur për artin e madh të shkathtësive që demonstrohet në këto lojëra, ndërsa sipas tij garuesit ishin të shkëlqyer.
Në këtë organizim, mysafirët e shumtë janë argëtuar edhe me muzikën e zgjedhur nga folklori I traditës shqiptare, sikurse ishin përformanca e AFA “Rugova”, Ansamblit të këngëve dhe të valleve nga Mitrovica si dhe atij të “Majat e Karafilit” nga Vuthaj si dhe rapsodët Rifat e Mehdi Berisha dhe Shaban Demaj e Bekë Nikçi.
Ky organizim ishte një ndër manifestimet organizative të futura në agjendën e maratonës festive “Peja pret diasporën” – “Mirë se erdhët bashkatdhetarë”, – nga aktivitetet e Drejtorisë së Kulturës dhe Komunës së Pejës.