Në Lugishtë të Hasit, sot është mbajtur manifestim përkujtimor në nderim të 8 dëshmorëve dhe 46 martirëve të këtij lokaliteti. Bashkëfamiljarë të dëshmorëve dhe martirëve, invalid e veteran të UÇK-së, banorë të Hasit dhe zyrtarë të institucioneve të ndryshme ishin të pranishëm në këtë manifestim kushtuar të rënëve për Liri.
Pjesë e këtij aktiviteti përkujtimor ishte edhe kryetari i Prizrenit, Ramadan Muja, i cili para të pranishmëve tha se në këtë takim po e përkujtojmë luftën e lavdishme të UÇK-së, duke shtuar se të rënët për Liri u shndërruan në themeltar të Pavarësisë së Kosovës dhe kujtimi për ta është edhe thesar për brezat e rinj, transmeton TVPz.
Në emër të fshatit foli Bekim Nerjovaj, i cili tha se ky lokalitet me dhembje por edhe krenari kujton të gjithë ata që u flijuan për Lirinë të cilën e gëzojmë ne sot.
Në nderim të jetës dhe veprës së dëshmorëve dhe martirëve të Lugishtës, u shfaq edhe një program i pasur artistik.