Fushata e dezinsektimit kundër rriqrave, po vazhdon në territorin e Komunës së Malishevës, dhe deri më tani fushata e dezinsektimit, ka përfunduar në pesë fshatra, Drenoc, Carrallukë, Lladroc, Senik dhe Astrazup, ndërsa sot është duke vazhduar në Dragobil, përderisa situata epidemiologjike, është e qetë dhe nuk ka raste të infektuara me ethe hemorragjike.
Fushata e dezinsektimit kundër rriqrave, bëhet në kuadër të luftimit dhe parandalimit të etheve hemorragjike krime kongo (EHKK).
Drejtori i drejtorisë për Mbrojtje dhe Shpëtim, Ahmet Morina, tha se “fushata e dezinsektimit, po ecën mirë dhe pa probleme, përderisa edhe banorët e këtyre vendbanimeve po shprehen të kënaqur, pasi ndihen më të sigurt, pas dezinsektimit dhe bashkëpunimi me banorët, është shumë i mirë”.
Ndërsa, sa i përket situatës epidemiologjike, gjendja aktualisht, është e qetë, pasi pavarësisht rasteve të thumbimeve, nuk ka asnjë rast të regjistruar me ethe hemorragjike.
“Jemi duke punuar vazhdimisht dhe me kujdes të shtuar në përcjelljen e situatës dhe fatmirësisht, këtë vit nuk kemi asnjë rast të regjistruar me ethe hemorragjike, por pavarësisht kësaj, jemi shumë të kujdesshëm në përcjelljen e situatës”, tha drejtori për shëndetësi Hajdin Berisha.
Drejtori Morina, ka bërë të ditur, se drejtoria që drejton, në vazhdimësi e “menaxhon fushatën e dezinsketimit dhe pavarësisht që ministria përkatëse, është duke financuar fushatën e dezinsektimit, për vetëm 1500 hektar, ne nuk do të ndalemi deri në dezinsketimin e tërë territorit, pasi aktualisht kjo është mënyra e vetme e parandalimit të EHKK”. /PrizrenPress.com/