Kjo ekspozitë ka për synim ta informojë publikun për jetën dhe veprën e humanistes shqiptare, shenjtores Nënë Tereza. Në një linjë kronologjike, në ekspozitë paraqiten dëshmitë e përzgjedhura të origjinës, fëmijërisë dhe rinisë së Gonxhe Bojaxhiut, shkuarjen e saj në misionin humanitar në Indi, ndikimin në arenën ndërkombëtare e deri tek çmimi Nobel për paqe.
Në hapje morën pjesë krerët e institucioneve të Kosovës, presidentja e Republikës së Kosovës, Vjosa Osmani, kreu i Qeverisë së Kosovës, kryeministri Albin Kurti, ministri i Kulturës, Rinisë dhe Sportit, Hajrulla Çeku, kryetari i Komunës së Prizrenit, Shaqir Totaj, përfaqësues të Ipeshkvisë së Kosovës, të ambasadave të akredituara në Kosovës, si dhe personalitete tjera të shumta nga jeta politike e kulturore e vendit tonë.
Presidentja Osmani në fjalën e saj tha që duhet ta kujtojmë gjithmonë veprën e madhe jetësore e shembullin e përkryer moral të cilin Nënë Tereza ia fali njerëzimit.
Ndërsa kryeministri Kurti e cilësoi si simbol i krenarisë së kombit, duke thënë që Nënë Tereza qe personalitet transcendental. Ajo kapërceu caqet e natyrës, të sajesës dhe të bindjeve që kufizonin, ndanin njerëzit dhe sillnin vuajtjet dhe padrejtësitë e njerëzimit./ PrizrenPress.com