Xherdan Shaqiri mund të vihet nën urdhrat e Jose Mourinhos sezonin e ardhshëm. Futbollisti me origjinë nga Kosova, që përfaqëson Zvicrën, pritet të marrë një ofertë nga “Djajtë e Kuq”, që sipas raportimeve të “The Sun” janë gati të paguajnë klauzolën që e çliron 26-vjeçarin nga Stoke City.Më rënien e Stoke City-t nga Premier League, Shaqiri, në bazë të marrëveshjes së nënshkruar mes palëve, mund të ndërpresë kontratën për 12 milionë funte.
Fillimisht u përfol për një interesim të Liverpoolit, por tashmë ka hyrë në garë edhe Man.United. Mourinho, që është i ftuar në Rusi për të komentuar ndeshjet e Botërorit, duket se është bindur nga paraqitja e lojtarit shqiptar në Rusi, pavarësisht se Zvicra nuk ia doli që ta kalonte fazën e 1/8-ave përballë Suedisë.
Dëshira e Xherdan Shaqirit është që të mbetet në Premier League dhe sigurisht, nëse Mourinho do t’i bëjë ofertë konkrete, vështirë se Shaqa do t’i thotë jo, një trajneri dhe skuadre të tillë.“Dëshiroj të mbetem në Premier League dhe shumë shpejt do ta kuptoni skuadrën time të re”, ka deklaruar Shaqiri së fundmi.Gjatë sezonit të kaluar lojtari shtatshkurtër u paraqit në 36 ndeshje të Premier League me Stoke City-n duke shënuar 8 gola. /Insporti.com