Kryetarja e Komisionit për Integrime Evropiane, Vjosa Osmani kritikoi Ministrinë e Punëve të Jashtme se është treguar neglizhente në procesin e anëtarësimit të Kosoves në Këshillin e Evropës. Ajo tha se sikur Kosova të bëhej anëtare e Këshillit të Evropës sovraniteti i Kosovës do të ishte shumë i fortë. Ndërsa zyrtarë të Ministrisë së Punëve të Jashtme thonë se gjatë këtij viti Kosova do të fillojë procedurat e anëtarësimit në Këshillin e Evropës.
Parlamenti Evropian është institucioni i vetëm i BE që e njeh pavarësinë e Kosovës. Edhe pse Ministria e Jashtme ka paralajmëruar që nga vitit 2011 se shumë shpejtë edhe një jnstitucion tjetër i BE-së do ta njeh realitetin e krijuar me 17 shkurt 2008, një gjë e tillë ende nuk ka ndodhur.
Vonesa po kritikohet nga subjektet opozitare në Kuvend. Kryetarja e Komisionit për Integrime Evropiane, Vjosa Osmani theksoi se MPJ-ja është duke u treguar neglizhente.
”Në fakt është e pafshme që Ministria e Punëve të Jashtme e ka prolonguar aplikimin në Këshillin e Evropës deri tani, siç e dini votat përfundimtare që duhet për anëtarësim 2 të tretat e anëtarëve të Këshillit të Evropës ka kohë që ekzistojnë. Krejt çka duhet është një lobim brenda asamblesë parlamentare të KE-së dhe kjo punë edhe pse është premtuar nga kjo ministri që nga viti 2011, nuk ka pasur hapa konkret”, theksoi Osmani, transmeton RTK.
Megjithatë zyrtarë të Minsitrisë së Punëve të Jashtme paralajmërojnë se brenda vitit do të fillojnë procedurat për aplikim në Këshillin e Evropës, ani që sipas zëvendësministrit të jashtëm, Petrit Selimi ky proces nuk varet nga vullneti i Kosovës.
”Tani kët vit, ashtu siç ka thënë ministri Hoxhaj po bëhen të gjitha përgatitjet juridike, ligjore e politike që Kosova të fillon procedurën e anëtarësimit në Këshillin e Evropës”.
Ndërsa Osmani kritikoi edhe mosbashkëpunimin e Ministrisë së Jashtme me Komisionin që ajo e drejton. Ajo tha se sikur Kosova të aplikonte brenda këtyre ditëve, do të kishte gjasa që ky zhvillim të përmbyllej deri në fund të vitit.
”Nuk mund të them me muaj se sa merr kohë ky proces, mirëpo nëse fillohet tani ka mundësi që të ketë lëvizje shumë të rëndësishme gjatë këtij viti. Nëse shtyhet prapë nga MPJ-ja atëherë do të prolongohet një proces i anëtarësimit në një organizatë që do të ishte esenciale për fuqizimin e shtetësisë së Kosovës”.
Ndryshe edhe rezoluta e Parlamentit Evropian e miratuar ditë më parë, ka bërë thirrje për anëtarësim të Kosovës në Këshillin e Evropës.