Nominimi i mundshëm i Hajredin Kuçit, për kryetar të Kuvendit të Kosovës, është një shenjë se PDK-ja ka filluar të mendoj edhe qëndrimin pak a shumë në opozitë- ndoshta për herë të parë që nga vendimi i fund gushtit i Gjykatës Kushtetuese të Kosovës.
Privatisht, por edhe publikisht, PDK gjatë tërë kohës ka dërguar sinjale se ajo nuk mund të jetë e kënaqur me postin e kryetarit të Kuvendit të Kosovës, dhe se synon që të ketë hise në Qeverinë e ardhshme. Pavarësisht spekulimeve në asnjë moment zyrtarë të PDK, nuk e kanë qartësuar se do të heqin dorë nga pozita udhëheqëse në qeveri, pra ajo e kryeministrit.
Vetë nominimi i Arsim Bajramit, i cili ka një kohë që nuk ka ndonjë peshë në parti, për të kryesuar Kuvendin e Kosovës, ka qenë një shenjë se nuk është ky post ai që intereson kreut të partisë- por është qeverisja me vendin.
Zgjatja e procesit të themelimit të institucioneve dhe më pas edhe deklarimi i Ambasadorës së SHBA-ve, Tracy Ann Jacobson- kë bërë që partitë të lëvizin në qëndrime, nga frika se mund të humbin të gjitha nëse qëndrojnë të ngurtë në pozicionet e deritanishme. Sepse deklaratat e ambasadores i prekën të gjithë- edhe Bllokun, por edhe PDK-në, që ato të lëvizin nga pozicionet e ngurta, sepse asnjëra palë nuk do ti merr të gjitha.
Në këtë frymë, ishin dje partitë e Bllokut, që edhe publikisht hoqën dorë nga tentimi për të marrë pozitën e krye parlamentarit dhe në fakt i premtuan PDK-së se do ta votojnë të nominuarin e saj, dhe kështu ti hapin dyert konstituimit të Kuvendit dhe më pas qeverisë nga ta, sikur edhe që e planifikuan me marrëveshje.
Zyrtarisht PDK nuk ka dhënë shenja se ajo do të bëjë ndonjë tërheqje. Por meqenëse topi tashmë është bartur te ajo, diskutimi i emrit të Kuçit, të paktën tregon se kjo parti ka filluar të marrë seriozisht krye parlamentarin, dhe të bëhet gati për opozitë. Një gjë të tillë e mendojnë shumë në këtë parti, pavarësisht se nuk e flasin.
Shumëçka megjithatë do të kthjellohet ditëve në vijim- edhe nëse PDK në tentim për të marrë të gjitha do rrezikoj ti humbet po të gjithat./Gazeta Blic/