Partia Demokratike e Kosovës(PDK) në Prizren nuk ka komentuar paralajmërimin e kryetarit të ri të Prizrenit, Mytaher Haskuka, për ngritjen e padisë ndaj Kujtim Gashit dhe Blerand Stavilecit.
Kryetari i PDK-së në Prizren, Minir Krasniqi ka thënë se viedo që është publikuar nga Gashi e Stavileci, është vlerësuar se paraqet shkelje zgjedhore.
“Prandaj, e kemi publikuar”, ka thënë Krasniqi për RTV Besa, transmeton “PrizrenPress”.
Kryetari i zgjedhur i Prizrenit, Mytaher Haskuka, dje e ka quajtur qesharake akuzën e Partisë Demokratike të Kosovës se Vetëvendosje ka bërë keqpërdorime në Prizren.Për videon e publikuar nga PDK-ja ku disa persona vërehen tek bartin kutit e votimit në një qendër në Prizren dhe me të cilën kjo parti thotë se dëshmon keqpërdorimet, Haskuka ka thënë se aty shihet procesi normal i bartjes së votave nga komisionerët, por ka shtuar se është shkelje ligji fakti që një parti politike i ka këto pamje.
“Gjatë gjithë procesit nuk ka pasur asnjë vërejtje nga komisionerët. Videoja është marrë dhe është prerë ashtu siç ka dashur dikush. Kjo është shkelje e ligjit pasi personat privatë nuk do të duhej ta kishin këto video. Por, PDK-ja mundohet të shpifë dhe të dezinformojë opinionin me servilët e tyre që punojnë për ta”.
Prandaj, Haskuka ka njoftuar se për disa zyrtarë të PDK-së edhe do të procedojnë kallëzime penale.
“Ne do të paraqesim kallëzim penal për shpifje për Blerand Stavilecin dhe Kujtim Gashin”.
Ndërkaq, kryetari i Degës së PDK-së në Prizren, Minir Krasniqi ka thënë se subjekti i tij politik i beson organeve të drejtësisë.
“I takon drejtësisë që të vlerësojë këtë video”, ka thënë Krasniqi./PrizrenPress.com/