Në periudhën nga 1 janari deri më 23 dhjetor 2024, aksidentet fatale në Kosovë kanë rënë me 7.37 për qind duke shënuar 88 raste, krahasuar me 95 aksidente fatale në të njëjtën periudhë të vitit 2023.
Numri i personave të vdekur ka rënë me 8.57%, duke shënuar 96 viktima në vitin 2024, krahasuar me 105 në 2023-ën.
Po ashtu, aksidentet me lëndime janë ulur me 7.20%, nga 8 mijë e 509 në 7 mijë e 896 aksidente.
Aksidentet me dëme materiale kanë pësuar një ulje të vogël prej 2.53%, nga 14 mijë e 214 aksidente në vitin 2023 në 13 mijë e 854 aksidente në vitin 2024.
Gjithsej, aksidentet kanë rënë me 4.29%, nga 22 mijë e 818 aksidente në 2023 në 21 mijë e 838 aksidente në 2024.
Ndërkohë, gjobat e shqiptuara nga Policia e Kosovës janë rritur me 12.86%, nga 630 mijë e 847 gjoba në vitin 2023 në 711 mijë e 953 gjoba në vitin 2024.
Policia e Kosovës, ka theksuar se mbetet e përkushtuar për të ofruar siguri për qytetarët e Kosovës dhe për të ruajtur besimin dhe transparencën, duke respektuar ligjet dhe garantuar të drejtat e njeriut.
