Të martën, në Gjykatën Themelore në Prizren ka dështuar të mbahet seanca ndaj të pandehurve Islam Thaqi, Jetmire Venezi, Egzonë Morina-Thaqi, Arian Taraku, Isë Bislimaj dhe Shqipëron Krasniqi, të cilët po akuzohen për tejkalim të kompetencave në rastin e rrënimit të aneksit të “Abi Çarshia” në Prizren.
Shkak për mosmbajtjen e kësaj seance ishte mungesa e të akuzuarit Arian Taraku dhe përfaqësuesit të palës së dëmtuar Irfan Fusha, raporton “Betimi për Drejtësi”.
Në lidhje me mungesën e të akuzuarit Arian Taraku, avokati Blerim Mazreku, deklaroi se nga i njëjti mbrëmë përmes telefonit është informuar se ka probleme shëndetësore.
Ndërsa prokurori Mehdi Sefa, deklaroi se janë bërë 11 muaj që nga ngritja e aktakuzës dhe ende nuk ka arritur të filloi shqyrtimi kryesor, andaj propozoi që lënda të veçohet ndaj të akuzuarit Arian Taraku, me qëllim të mos zvarritjes së rastit.
Mirëpo propozimin e prokurorit e kundërshtoi avokati Blerim Mazreku, i cili deklaroi se provat janë të ndërlidhura në mes të pandehurve në këtë shqyrtim dhe veçimi i procedurës do ta dëmtonte mbrojtjen për të mbrojturin e tij.
Trupi gjykues me kryetare gjyqtaren Kymete Kicaj, mori vendim që të refuzoi propozimin e prokurorit Sefa, ndërsa seanca e sotme u shty dhe e njëjta do të mbahet nesër me 10.02.2021 në ora 10:00.
Ndryshe, Prokuroria Themelore në Prizren, më 20 dhjetor 2019, ka ngritur aktakuzë ndaj Islam Thaqi, Jetmire Venezi, Egzonë Morina-Thaqi, Arian Taraku dhe Isë Bislimaj, duke i ngarkuar me veprën penale “keqpërdorim i pozitës apo autoritetit zyrtar”.
Në aktakuzë thuhet se me 19 dhe 21 korrik 2019 në Prizren, në objektin “Abi Çarshia”, të akuzuarit Islam Thaqi, në cilësinë e drejtorit të Inspektoratit, Jetmire Verezi dhe Egzona Morina Thaqi, inspektore të ndërtimit, Arianit Taraku dhe Isë Bislimaj, zyrtarë në Drejtorinë e Inspektoratit, Shqipëron Krasniqi, përfaqësues ligjor në Komunën e Prizrenit, duke shfrytëzuar detyrën apo autoritetin zyrtar, i tejkalojnë kompetencat e tyre me qëllim të shkaktimit të dëmit “Abi” SHPK në Prizren.
Sipas aktakuzës, të akuzuarit realizojnë rrënimin e aneks-objektit të “Abi Çarshia”, duke e ditur se i dëmtuari ka dorëzuar aplikacionin për legalizim, të njëjtit veprojnë në kundërshtim me Ligjin për trajtimin e ndërtimeve pa leje, me Udhëzimin Administrativ nr.06/19, me Ligjin mbi procedurën e përgjithshme administrative, si dhe vendimet e Ministrisë së Mjedisit dhe Planifikimit Hapësinor, nr. A-213/18 dhe A-179/19, me të cilat janë anuluar aktvendimet e Drejtorisë së Inspektoratit Komunal të Ndërtimtarisë në Prizren.
Sipas Prokurorisë, këto vendime obligojnë organet komunale në Prizren të veprojnë konform Ligjit për trajtimin e ndërtimeve pa leje, si dhe udhëzimeve administrative në fuqi, andaj sipas aktakuzës, të akuzuarit duke mos i përfillur këto vendime, veprojnë në kundërshtim me ligjet në fuqi, me ç’rast gjatë rrënimit të aneksit të “Abi Çarshia” i shkaktojnë dëm në shumën prej 69,729.66 euro.
Me këto veprime, të gjithë të akuzuarit ngarkohen se kanë kryer veprën penale “keqpërdorim i pozitës apo autoritetit zyrtar”, nga neni 414 paragraf 2-1 lidhur me nenin 31 të KPRK-së. /BetimipërDrejtësi