Në sheshin “Skënderbeu” në Prishtinë kanë protestuar të qetë qytetarët dhe veteranët e ish-Ushtrisë Çlirimtare të Kosovës. Kjo protestë pa organizatorë, përfundoi brenda 30 minutash, me fjalimin që mbajtën përfaqësuesit e familjeve të të zhdukurve dhe ata të veteranëve.
Në fillim të protestës u kërkua që të ketë “bashkim e veprim”, siç u tha për t’i ruajtur frytet e luftës çlirimtare. Po ashtu u kërkua që të ruhen raportet me aleatët strategjik dhe të ruhet ekzistenca e shtetit, e cila, sipas tyre është në prag të shkatërrimit nga “tradhtare e pushtetit”.
Bajram Çerkini, kryetar i Shoqatës së familjeve të të pagjeturve të luftës “Zëri i prindërve”, akuzoi partinë në pushtet që nuk po i përkrah familjet e dëshmorëve dhe veteranët e luftës.
“Ruani se ju nuk e dini çka është liria, ju dini vetëm të gënjeni, vetëm të na mashtroni, ju jeni vetëm të na shëmtoni më keq se ata gjakpirësit e tmerrit 98-99”, tha Çerkini, sipas të cilit, veteranët e UÇK-së kanë të drejtë të kenë një pagë normale, dhe të marrin frymë normal për të jetuar e për t’i shkolluar fëmijët e tyre.
Kurse veterani i luftës, Avni Ajeti, tha se të drejtat nuk po mohohen nga regjimi i atëhershëm i Millosheviqit, por nga qeveria e shtetit të Kosovës, për të cilën “kemi dhënë gjithçka që kishim”.
“Sot jemi këtu përpara Qeverisë së Kosovës së pavarur, që e kemi çliruar me gjak e sakrificë, e në të cilën për veteranët e UÇK-së ende po pyeten kriminelët serb, që na i vrasin e na i rrahin policët në veri”, tha Ajeti.
Ai tha se nuk janë zënë në befasi nga kjo që po ndodh.
“Ne edhe sulmet e befasishme të armikut i kemi kthyer në kundërsulm, andaj sot jemi këtu që me fjalën e lirë t’i japim përgjigjeje këtij trajtimi të padinjitetshëm që po i prek kufijtë e tradhtisë”, shtoi Ajeti.
Tutje ai shtoi se veteranët e Ushtrisë Çlirimtare, nuk e kanë ulur kokën kurrë, por gjithmonë ballëhapur kanë qëndruar në front. “Andaj edhe sot po qëndrojnë krenar, për të drejtat e tyre dhe për të kundërshtuar këtë qeveri që po i trajton veteranët duke marrë direktiva nga njerëzit e Vuqiçit”, tha ai.
Në këtë protestë u panë edhe deputetë të partive opozitare.
Në sheshin “Skënderbeu” mblidhen qytetarët për protestë, s’dihet organizatori
Në sheshin “Skënderbeu” në Prishtinë kanë protestuar të qetë qytetarët dhe veteranët e ish-Ushtrisë Çlirimtare të Kosovës. Kjo protestë pa organizatorë, përfundoi brenda 30 minutash, me fjalimin që mbajtën përfaqësuesit e familjeve të të zhdukurve dhe ata të veteranëve.
Qytetarë me flamujt e kombëtar, të Kosovës e të UÇK-së, janë në pritje të fillimit të protestës e caktuar për ora 18:00.
Policia ka deklaruar se nuk ka pranuar asnjë kërkesë për mbajtje të protestës, kurse pjesëtarë të kësaj të fundit shihen në numër pak më të madh rreth ndërtesave të Qeverisë e të Kuvendit.
Kujtojmë se sot (e shtunë) protestojnë veteranët e Ushtrisë Çlirimtare të Kosovës (UÇK) në Prishtinë. Protesta vjen si kundërshtim i vendimit të miratimit të Projektligjit për pagën minimale, ku ata nuk janë përfshirë.
Ushtruesi i detyrës së Organizatës së Veteranëve të Luftës, Faton Klinaku, tha se ata nuk janë organizator, por e mbështesin protestën. Ai ka bërë të ditur se veteranët e UÇK-së po ashtu kanë vendosur që ta pengojnë funksionimin e punës në Kuvendit të Kosovës, sa herë që mbahen seancat deri në përmbushjen e kërkesave të tyre. Në mbështetje të protestës kanë dalë edhe figura politike e publiket.rtk