Një ditë pasi Vadet Avdiu ka marrë votat e Këshillit Drejtues të Teatrit Kombëtar të Kosovës për t’u bërë drejtor, kanë shpërthyer akuzat se ai është i dërguar nga politika.
Një pjesë e komunitetit artistik, duke përfshirë edhe ata që kanë qenë në garë për drejtor, e kanë cilësuar procesin si montim politik e klanor. Akuza kanë bërë edhe partitë politike opozitare. Si njeri që ka dalë nga zarfi i Ministrisë së Kulturës e ka cilësuar Avdiun regjisori Bekim Lumi. Kundërkandidati i tij, Adrian Morina, ka thënë se ka pesë muaj prej se njëri nga anëtarët e Këshillit Drejtues ia ka prezantuar Avdiun si drejtor. Përkundër kësaj, vetë Avdiu nuk ka pranuar të prononcohet.
Gazeta ka fotografi ku Avdiu, edhe pse mohon të jetë pjesë e strukturave të PDK-së, ka qenë i pranishëm në konferencat që janë udhëhequr nga numri dy i kësaj partie, ish-shefi i ShIK-ut Kadri Veseli.
Njëra nga fotografitë që ka tri javë prej se qarkullon nëpër media, kur “Koha Ditore” raportoi se Avdiu po favorizohet politikisht për drejtor të TKK-së, është bërë në ambientet e Partisë Demokratike të Kosovës. Përveç kësaj, më 13 tetor të vitit të kaluar, kur zëvendëskryetari i PDK-së Kadri Veseli, ua kishte dhënë librezat 20 anëtarëve të rinj në zyrën qendrore të PDK-së në Prishtinë, në fotografinë që e ka shkrepur fotoreporteri i “Kohës Ditore“, shihet edhe Valdet Avdiu, ani pse ai mohon vazhdimisht se është pjesë e kësaj partie politike. Avdiu nuk i është përgjigjur gazetës në lidhje me këtë fakt.
I përfoluri si shef i Degës së ShIK-ut në Gjakovë dhe njeri i afërt i Kadri Veselit vazhdimisht ka deklaruar se nuk ka qenë pjesë e këtij shërbimi. Por vetë Avdiu ka lënë të kuptohet se punon për Kadri Veselin.
Kandidati i vetëm nga fusha e teatrit, i cili ka kandiduar për drejtor të mërkurën në një konferencë për media ka thënë se skenarin për zgjedhjen e Avdiut në krye të TKK-së e ka shkruar ish-këshilltari i kryeministrit të Kosovës, regjisori Fadil Hysaj, njëri nga anëtarët e Këshillit Drejtues.
“Me 29 nëntor pas premierës së shfaqjes ‘Shembja e Kullës së Ajfelit’, Fadil Hysaj më ka dhënë shumë komplimente për shfaqjen dhe më ka prezantuar drejtorin e ardhshëm të TKK-së. Jemi duke folur për një periudhë pesë muaj më herët”, ka thënë Morina