Publicistët kanë komentuar në mënyra të ndryshme zhvillimet në PDK dhe ikjet e disa anëtarëve të PDK-së në partinë e re të Jakup Krasniqit. Disa janë të bindur se Krasniqi do të arrijë t’i marrë një numër të elektoratit PDK-së, e të tjerët nuk mendojnë se kjo iniciativë do ta çoj në humbje PDK-në.
Publicisti Halil Matoshi konsideron se ndarja e të pakënaqurve nga një parti është shumë normale në një demokraci, ndërkaq fraksionet nuk janë gjithmonë të dëmshme për partinë në fjalë. Sipas tij ndarja e një fraksioni- njerëzit e Jakup Krasniqit dhe Fatmir Limajt, nesër mund të hyjnë sërish në koalicion më martinë nënë, varësisht prej konfigurimit të pushtetit, shkruan Bota Sot.
“Mirëpo Krasniqi poqë se me iniciativën e tij qytetare do të garantonte për marrjen e Drenasit, në zgjedhjet e nëntorit të sivjetmë, jam i bindur se ai do të fitonte dhe do ta dëmtonte sado pak PDK-në. PDK-ja megjithatë vazhdon të jetë parti monolite dhe e fortë, ndonëse çarjet e para paralajmërojnë një udhë bash sikur të LDK-së”, shprehet Matoshi.
Nga ana tjetër Behxhet Shala është i bindur se formimi i një partie të re nga Jakup Krasniqi, do të arrijë të marr një pjesë të elektoratit sidomos në Malishevë dhe në Drenas.
“Elektorati i Jakup Krasniqit nuk i jep votën me PDK-së, që do të thotë se kjo iniciativë e dobëson PDK-në, por nuk besoj se mund ta dobësojë në atë masë që e rrezikon PDK-në. Pra, mund ta rrezikojë, por jo në atë masë të madhe, sepse kjo iniciativë qytetare është formuar shumë vonë pak para zgjedhjeve”, tha Shala. /Bota Sot/