Mauricio Pochettino, pas fitores 4-2 ndaj Strasburgut të shtunën, ka thënë se është shumë i lumtur me Kylian Mbappen.
Sulmuesi francez u vërshëllye nga tifozët e Paris Saint-Germain. Mbappe, i cili është lidhur vazhdimisht me Real Madridin, shënoi një gol teksa i sapoardhuri Lionel Messi e shikonte nga tribuna.
“Unë nuk i dëgjova vërshëllimat. Jam shumë i lumtur me të. Ai është i fokusuar në atë që duhet të bëjë dhe pati një lojë vërtet të mirë. Ai duhet të vazhdojë në këtë rrugë”, ka thënë Pochettino për “L’Equipe”.
“Është shumë e rëndësishme për ne që të kemi përkrahësit tanë rreth nesh. Është e jashtëzakonshme dhe na ka munguar shumë. Futbolli është krejtësisht i ndryshëm me spektatorë. Me prezantimin e të sapoardhurve ishte një mbrëmje e mrekullueshme për PSG-në. Tani ne duhet t’i përgatitim ata gradualisht, pa marrë shumë rreziqe, pavarësisht nëse është Leo Messi apo të tjerët”, ka shtuar Pochettino.
