Ndoshta 2003 / 2004. Klasa e katërt fillore.
Burri i shitores ballë shkollës
Në frigoriferin e tij të madh
Mbante distinktivët klasorë.
Ata që pinin Multi Sola ishin klasa e mesme e lartë.
Ata që pinin RC Cola ishin klasa e mesme e ulët.
Ata që s’pinin fare ishin klasa punëtore.
Ata që vështronin ishin të varfrit.
Dikush i klasës së mesme të ulët
… nganjëherë vetë-varfërohej për një ditë e gjysmë,
Që sot të blinte një Multi Solë me paratë e kursyera dje.
Filan fëmije një ditë vodhi diku një shumë parash
Dhe rroi si klasë e mesme e lartë për nja dy javë
Bashkë me tre shokët e tij të klasës që i qeraste.
Dikur u zu.
Mbeti pa klasë.
Pa dinjitet.
Mbet’ shkret.
Fëmijë që ha gjyqin e tollovisë
Në të cilën e kanë katandisur të rriturit.
Endet i molepsur, barkthatë,
Dikush bythën butë në kolltuk
Tund kokën mendje-ngratë,
E quan të paedukatë.
T’i definosh përkatësitë klasore
Përmes SOKAVE.
Dikush në atë ftohës e sheh parajsën
E dikush ferrin.
Secili luftuaka me armët që ka:
Dikush e blen,
E dikush do ta thyejë frigoriferin.
Dhe ky s’është promovim.
As aprovim.
Është veç konstatim.
23.03.2021
Lum Gashi