Shtëpia e presidentit të PSG-së, Nasser Al-Khelaifi, u bastis këtë të mërkurë si pjesë e hetimit për akuzat për rrëmbim dhe torturim të një biznesmeni franko-algjerian në Katar në vitin 2020.
“Gjyqtari hetues kërkoi informacione dhe akses shtesë, të cilat iu dhanë në mënyrë të plotë dhe transparente, në bashkëpunim të plotë me autoritetet, siç ka qenë rasti që në fillim”, tha një zëdhënës i presidentit të PSG-së për “AFP”.
Ky kontroll i kryer nga policia gjyqësore u bë në kuadër të një hetimi gjyqësor të hapur në fund të janarit pas depozitimit nga Tayeb Benabderrahmane, 42 vjeç, të një ankese për veprim civil.
Benabderrahmane denoncon arrestimin e tij në janar 2020 në Katar, ku ishte vendosur tre muaj më parë. Ai pretendon se është rrëmbyer për gjashtë muaj dhe se është marrë në pyetje nga zyrtarët lokalë, veçanërisht për dokumentet që ai kishte, që mund të komprometonin Al-Khelaifi.
Më pas ai thotë se iu vu në arrest shtëpiak dhe më në fund u lejua të largohej nga Katari në nëntor 2020, pasi nënshkroi një protokoll konfidencialiteti në të cilin premtoi se nuk do t’i zbulonte këto dokumente.
Avokatët e Nasser Al-Khelaifi njoftuan në prill synimin e tyre për të ngritur një padi për shpifje kundër Benabderrahmane.