Presidenti i FIFA-s, Gianni Infantino, e ka paralajmëruar futbollin të përgatitet për më të keqen, por ka këmbëngulur se organi qeverisës i futbollit botëror do të bëjë gjithçka për të ndihmuar, pas pandemisë koronavirus.
Në këto kohëra sprove, me futbollin në gjithë botën që është pezulluar për shkak të përhapjes së pakontrollueshme të Covid-19, FIFA është duke i zbrazur xhepat për t’i ndihmuar organizatat e prekur ekonomikisht, transmeton Gazeta Express.
Por i pari i FIFA-s ka thënë se nuk mund të thuhet me siguri se kur do të rikthehet futbolli.
“Shëndeti vjen i pari, pastaj gjërat e tjera. Për menaxherët dhe të tjerët, të shpresojmë për më të mirën, por po ashtu të përgatitemi për më të keqen”, tha Infantio për La Gazzetta dello Sport.
“Pa bërë panik, ta themi qartë: do të luajmë futboll përsëri vetëm atëherë kur mund ta bëjmë pa ia rrezikuar shëndetin të tjerëve”, shtoi ai.