Dje, në hotel Theranda në Prizren, Misioni i OSBE-së në Kosovë mbajti një tryezë të rrumbullakët me gjyqtarë, avokatë, mbrojtës të viktimave dhe bashkëpunëtorë profesionalënë të cilën u bë prezentimi i një Raporti të lëshuar rishtaz nga Misioni i OSBE-së në Kosovë, i titulluar “Shqyrtimi i zbatimit të Kodit të ri të Procedurës Penale”.
Ky raport ofron një pasqyrë të përgjithshme të zbatimit të Kodit të ri të hyrë në fuqi në janar të vitit 2013, duke futur kështu ndryshime të mëdha në procedurën penale dhe duke u dhënë role të zgjeruara mbrojtjes dhe prokurorisë, ndërsa gjyqtarëve përgjegjësi dhe kompetenca të reja që u mundësojnë atyre të veprojnë më mirë si mbrojtës të të drejtave të palëve.
Në këtë tryezë morën pjesë rreth njëzet (20) pjesëmarrës. Fjalime hyrëse bënë kryetari Ymer Hoxha, në emër të Gjykatës Themelore të Prizrenit dhe zyrtari ligjor Meriton Pajaziti nga Misioni i OSBE-së në Kosovë, i cili edhe e moderoi takimin. Më pas u vazhdua me një diskutim përmbajtësor në lidhje me të gjeturat e raportit, të cilat u pranuan në mënyrë konstruktive nga të gjithë pjesëmarrësit.
Raporti jep rekomandime për përmirësimin e zbatimit të këtij Kodi nga institucionet përkatëse, me qëllim të garantimit më të mirë të së drejtës për një gjykim të drejtë. /PrizrenPress.com/