Komuna e Prizrenit ka njoftuar tatimpaguesit të cilët kanë borxhe të papaguara për tatimin në pronë, të lajmërohen në Drejtorinë për Ekonomi e Financa për lidhje të kontratës së pagesës me këste për obligimet e papaguara.
“Ndaj tatimpaguesëve të cilët nuk shprehin interes për lidhjen e kontratës për pagesën e obligimeve të tatimit në pronë me këste, Drejtoria për Ekonomi e Financa – Zyra e Tatimit në Pronë në Komunën e Prizrenit, do të iniciojë procedura përmbarimore për inkasim të detyrueshëm”, thuhet në njoftim të Komunës së Prizrenit.
“Të gjitha shpenzimet rreth procedurës së përmbarimit do t’i ngarkohen tatimpaguesit, ashtu që kjo do ta rritë edhe më tepër barrën tatimore”.
“Prandaj, për t’i shmangur të gjitha këto ngarkesa, Drejtoria për Ekonomi e Financa – Zyra Komunale e Tatimit në Pronë ofron mundësinë e pagesës me këste përmes kontratës në mes të tatimpaguesit dhe Komunës”.