Presidentja e Kosovës, Atifete Jahjaga, e cila është përfshirë në gjetjen e një zgjidhje për tejkalimin e bllokadës politike, ende nuk i është drejtuar Flora Brovinës për të thirrur seancën.
Këtë e kanë bërë shumë ambasadorë të huaj në Kosovë, në mesin e të cilëve edhe ajo amerikane, Tracey Ann Jacobson.
Këto thirrje për vazhdimin e seancës konstituive po bëhen pasi Blloku ka hequr dorë nga pozita e Kryeparlamentarit, të cilën e kanë synuar prej se janë certifikuar zgjedhjet nacionale.
Me këtë rast, Presidentja vetëm po kërkon gjetjen e një zgjidhje dhe po u kërkon liderëve të mos e mbajnë peng formimin e institucioneve të reja.
Por, Jahjaga asnjëherë, prej se janë krijuar rrethanat e reja, nuk ka kërkuar nga Kryesuesja Flora Brovina që ta thërras vazhdimin e seancës konstituive.
Zyrtarë të ndryshëm të partive politike kanë deklaruar se javën e ardhshme duhet të mbahet seanca dhe të konstituohet Kuvendi i ri.