Forumi Kulturor publikoi raportin “Kultura në politikat shtetërore të Kosovës”, i cili fokusohet rreth resurseve dhe limiteve të skenës kulturore të Kosovës. Raporti është pjesë e projektit Forumi për Zhvillim Kulturor, i financuar nga Zyra e Bashkimit Evropian në Kosovë dhe Olof Palme International Center, ndërsa po zbatohet nga Forumi Kulturor, Teatri ODA dhe DokuFest.
Raporti “Kultura në politikat shtetërore të Kosovës” përqendrohet në katër pika: korniza ligjore dhe e politikave, buxheti shtetëror për kulturën, organizatat e pavarura kulturore dhe komunikimi i kulturës me politikat tjera publike. Në mënyrë të veçant, raporti trajton çështjet si: korniza ligjore dhe politikat të cilat e rregullojnë sektorin e kulturës në Kosovë, sa janë të harmonizuara ligjet e kulturës me nevojat e sektorit, a ka dokumente të zhvillimit strategjik të kulturës të adoptuara në nivelin lokal dhe qendror të qeverisjes, si është ndarja e buxhetit për kulturë në nivelin lokal dhe qendror, çfarë prioriteti ka kultura në agjendën e zhvillimit të vendit dhe cilat janë pengesat kryesore me të cilat përballen institucionet kulturore dhe organizatat e pavarura kulturore sot.
Ky raport ka për qëllim nxitjen e institucioneve shtetërore për të rishikuar qasjen ndaj kulturës dhe rekomandon këto veprime:
-Hartimi i shtrategjisë shtetërore të kulturës, që do të shërbente si bazë për planifikimin kulturor dhe atë të përgjithshëm zhvillimor të Kosovës. Hartimi i strategjisë duhet të zhvillohet si process paralel në të dy nivelet e qeverisjes,
-Rishikimi i kornizës rregulluese për kulturën (ligjet, aktet nënligjore) në mënyrë që të konfirmohet relevanca e tyre për zhvillimin e sektorit dhe kjo të reflektohet në dokumentin strategjik për kulturën për ta përcaktuar modelin më të mirë të kornizës rregulluese për sektorin,
-Trajtim meritor i kulturës së pavarur nga institucionet e shtetit, që duhet të reflektohet në politikat kulturore dhe buxhetin shtetëror për kulturën,
-Vlerësimi i prodhimtarisë artistike dhe financimi të bëhet në baza meritore, për të mos i privilegjuar institucionet publike të kulturës,
-Ndarja e granteve institucionale për organizatat e pavarura kulturore, që do të ndihmonte në qëndrushmërinë e tyre financiare,
-Sferat e tjera të politikave publike të kenë komunikim të duhur me kulturën, në mënyrë që të respektohen parimet e planifikimit të integruar zhvillimor. /PrizrenPress.com/