Kryetari i LDK-së Isa Mustafa ka thënë se akoma nuk kanë pranuar letër nga presidenti Hashim Thaçi rreth çështjes së mandatarit për formimin e Qeverisë së re.
I pyetur se a mund të ketë takim paraprakisht me presidentin Thaçi, Mustafa ka thënë se kjo nuk varet prej tij dhe se po presin thirrjen prej tij.
“Akoma s’kemi ftesë, kur të thërrasin do t’i përgjigjemi. Dhe të shohim çfarë do të thotë presidenti”, ka thënë Mustafa, raporton Koha.
Lidhja Demokratike e Kosovës në sinkron me presidentin Hashim Thaçi ka ndërmarrë veprime shtesë të hënën, në funksion të formimit të një qeverie të re, pjesë e së cilës nuk është paraparë të jetë subjekti fitues i zgjedhjeve të fundit, Lëvizja Vetëvendosje (LVV).
Thaçi ka paralajmëruar se do ta anashkalojë Vetëvendosjen dhe kësisoj, pritet që emrin e mandatarit ta marrë nga LDK-ja.