Qeveria e Kosovës ka treguar arsyet se pse kanë vendosur t’i shtojnë masat e sigurisë përreth godinës kryesore qeveritare.
Sipas një sqarimi të lëshuar nga Zyra e Kryeministrit është thënë se, vendimi për shtimin e masave të sigurisë është marrë pas rekomandimeve të institucioneve përkatëse.
“Qeveria e Republikës së Kosovës me qëllim të njoftimit sa më të drejtë të opinionit lidhur me gjendjen e sigurisë në vend dhe nivelin e sigurisë për zyrtarët dhe institucionet e Republikës së Kosovës, informon se masat e sigurisë të implementuara ditëve të fundit janë vazhdimësi e masave të sigurisë të ndërmarra para disa muajsh si rezultat i rekomandimeve për gjendjen e sigurisë në rajon dhe të njëjtat nuk i atribuohen zhvillimeve të fundit në vend”, është thënë në sqarimin e Zyrës për Komunikim Publik të Kryeministrit.
Qeveria e Republikës së Kosovës ka siguruar qytetarët e Republikës së Kosovës se institucionet e sigurisë janë në nivel të detyrës dhe nuk ka arsye për shqetësim lidhur me gjendjen e sigurisë në vend.
Qeveria e Kosovës, të hënën ka zgjatur rrethojat prej hekuri që janë të vendosura përreth godinës qeveritare.